NAGPAHAYAG ng pagkabahala si Senador Win Gatchalian sa sinapit ng mga pamilyang nasunugan sa Quiapo, Maynila noong Hunyo a-kwatro, lalo na’t problema din ng mga magulang na baka hindi makapasok sa eskwela ang mga anak dahil sa nangyaring trahedya.
Ayon kay Gatchalian, pinalala pa ang sitwasyon ng kakulangan ng mga evacuation center, kaya wala nang nagawa ang ibang pamilya kundi umupa na lang ng masikip na espasyo sa kalapit na mga barangay para lang magkaroon ng pansamantalang masisilungan.
Upang maibsan ang kanilang pasanin, personal na pinuntahan ni Gatchalian ang mga apektadong pamilya at pinangunahan ang pamamahagi ng bigas ngayong araw sa Barangay 384. Anim na raang sako ng bigas ang kanyang ipinamahagi sa mahigit 500 pamilyang nawalan ng tirahan sa sunog.
“Ang tulong na ito ay para magbigay ng agarang ginhawa habang nagsisimula ang mga pamilya na makabangon. Habang sinusubukan nilang iligtas ang kaunting gamit na natira mula sa sunog, nahaharap din sila sa hamon ng paghahanda ng kanilang mga anak para sa pagbubukas ng klase,” pahayag ni Gatchalian.
“Bigyan natin sila ng pag-asa para sa kanilang pagbangon, at ng pangako na hindi natin sila pababayaan. Dapat nating tiyakin na natutugunan ang kanilang mga pangunahing pangangailangan,” dagdag niya.
