IDINAOS ng Provincial Government of Laguna (PGL), sa pamamagitan ng Provincial Human Resource Management Office (PHRMO), ang “4th Quarter Pasasalamat Lingkod Kapitolyo at Loyalty Incentive Awards 2023” sa Laguna Cultural Center noong ika-18 ng Disyembre 2023.
Kinatawan si Gobernador Ramil Hernandez nina Provincial Administrator Atty. Dulce Rebanal, at PHRM Officer Leah Teresa Javier sa pamimigay ng certificates of recognition at cash incentives sa 29 na retirees; pati na rin ang 92 Bronze, 101 Silver, at 136 Gold loyalty awards.
Sa pamamagitan ng nasabing mga parangal, kinikilala at pinahahalagahan ni Hernandez ang pagsusumikap at talento ng mga empleyado ng PGL, na nag-uudyok sa kanila na maging mas nakatuon at produktibong mga indibidwal; at magsilbing inspirasyon sa iba na ibigay ang kanilang makakaya sa paghahatid ng de-kalidad na serbisyo sa publiko nang may angkop na sipag at integridad.
