ISINAGAWA nitong Miyerkules, Hulyo 15, 2026 ang ikaanim na araw ng paglilitis kay Vice President Sara Duterte. Upang magkaroon tayo ng dagdag na kaalaman, himayin natin ang mga tampok na pangyayari sa nakaraang ikaanim na araw.
Ang ikaanim na araw ng paglilitis sa impeachment ni VP Sara nitong Miyerkules ay nakasentro sa mga oral argument kung dapat bang i-subpoena ng Senate impeachment court ang mga bank record, tax return, at mga dokumento ng Anti-Money Laundering Council ni VP Sara kaugnay ng Artikulo 2 ng reklamo sa impeachment, na nagsasabing may hindi maipaliwanag na kayamanan at mga hindi idineklarang ari-arian. Isinama na rin dito ang record ng asawa abogadong si Manases Carpio.
Oral argument
Walang saksi ang humarap, at ang magkabilang panig ay binigyan ng tig-15 minuto para sa mga argumento at 10 minuto para sa rebuttal. Si House prosecutor Rep. Chel Diokno ang nagsalita mula sa prosecutor habang si Atty Michael Poa ang nagsalita sa defense.
Ang oral argument o oral na pagtatalo ay isang pormal na paghaharap ng mga abogado sa korte kung saan ipinapaliwanag nila ang kanilang mga panig, binibigyang-diin ang mga legal na punto at sinasagot ang mga katanungan ng hukom.
Ikinatwiran ng prosekusyon na ang aktibidad sa pananalapi ni Duterte ay tumaas nang malaki simula noong 2007, binabanggit ang isang ulat ng AMLC na isinumite sa House committee on justice. Sinabi ni House prosecutor Rep. Chel Diokno na ang halaga ng transaksyon ay umabot sa P208.15 milyon nang taong iyon, kung saan tumindi ang mga paggalaw sa pananalapi sa pagitan ng 2009 at 2013.
Samantala, nagbabala depensa sa pamamagitan ng kanilang abogado na si Michael Poa na ang kahilingan para sa subpoena ay maaaring maging isang fishing expedition.
Ang fishing expedition ay isang idyoma (idiomatic) na tumutukoy sa paghahanap ng impormasyon o ebidensya nang walang tiyak na direksyon, batayan, o partikular na akusasyon. Madalas itong ginagamit sa mga usaping legal, imbestigasyon, o trabaho kung saan ang naghahanap ay umaasa lamang na makatsamba ng anumang maanomalyang impormasyon.
Mariing sinabi ni Poa na ang impeachment ay hindi batayan para balewalain ang due process o mapilit na paggawa ng mga dokumentong lampas sa pinahihintulutan ng batas.
Idinagdag pa ni Poa na kapag ang isang subpoena ay naging mapang-api at inilabas lamang sa pag-asang may lilitaw na isang bagay na magdudulot ng pagkakasala, hindi na ito maaaring maging instrumento ng hustisya.
Pagkatapos ng oral argument, sinabi ni Senador at presiding officer Francis Escudero na nagkasundo ang mga senator-judge sa caucus na magdesisyon sa bagay na ito sa Lunes, Hulyo 20.
Dagdag na pag-urong ng mga witness ng prosecutor
Samantala, iniurong ng House prosecution panel at hindi na pahaharapin sa impeachment ang lima sa kanilang mga natitirang testigo sa Article 4 o ang pagbabanta ni Duterte kay Pangulong Ferdinand Marcos, First Lady Liza Araneta-Marcos at dating House Speaker Martin Romualdez.
Sinabi ni lead House prosecutor Gerville Luistro na nagpasya ang prosekusyon na tanggalin na bilang witness ang isang kinatawan ng Philippine National Police Firearms and Explosives Office, mga mamamahayag na sina Mickel Flores at Bonz Magsambol, isang sheriff na sangkot sa isang insidente noong 2011 kasama si Duterte, isang miyembro ng pamilya ng isang umano’y biktima ng banta at isang psychiatrist, dahil sa binanggit na “kalabisan… at kakulangan ng pangangailangan.”
Dahil sa binagong hanay ng mga saksi, si NBI Director Melvin Matibag ay titistigo sa Martes bilang huling saksi ng prosekusyon para sa Artikulo IV, na may kinalaman sa umano’y mga banta ni Duterte.