Mga dahilan ng pagbulusok ng YOY inflation sa 1.4% noong Abril 2025

ANU-ANO ang mga dahilan ng pagbulusok ng year-on-year (YOY) inflation sa 1.4% noong Abril 2025 mula sa 1.8% noong noong nakaraang buwan. Mapanatili kaya ang mababang inflation rate sa buong taon?

Bumulusok pababa sa 1.4% ang YOY inflation sa ikaapat buwan ng 2025 na sinabayan ng malaking bawas sa MOM inflation. Ito ang pinakamababang antas ng YOY inflation sa loob ng higit sa limang taon. (Table 1).

Gaya noong nakaraang buwan, ang pagbulusok ay naranasan nang malakihan sa pagkain, ngunit bahagyang in-offset ito ng pagtaas ng inflation sa non-food. Bumaba ang YOY inflation ng pagkain mula sa 2.2% sa 0.7%. Ito ay dahil walang El Niño ngayong unang apat na buwan ng taon. Normal lang ang mainit na panahon at ang pag-ulan sa iba’t ibang bahagi ng bansa.

Bumaba ang presyo ng bigas ng -10.9%, ang pinakamababa nitong YOY inflation simula noong Disyembre 2019. Ito ay dahil sa pagtaas ng suplay mula sa masaganang ani na umakyat ng 1.1% noong unang quarter at  ang pagbaba ng taripa ang inaangkat sa ibang bansa, at ang pagnormalisa ng produksyon sa buong mundo. Sinabayan ito ng pagbaba ng YOY inflation ng karne sa 7.7% mula sa 8.2% noong nakaraang buwan, gulay sa 3.3% mula sa 6.9%, isda sa 4.3% mula sa 5.5%, at asukal sa -0.7% mula sa 0.2%.  Ngunit umangat ang inflation gatas ng 4.0% mula sa 3.4% dahil sa presyo sa merkadong pandaigdig.

Umangat ang YOY inflation ng non-food items ng 1.7% mula sa 1.4% dahil sa pagtaas ng YOY inflation ng utilities (housing, water, electricity, gas and other fuels).  Nagtaas ng  Manila Electric Company (Meralco) ng P0.7226 per kWh sa April electricity rate kaya ang binabayaran ng typical household ay rumatsada ng  P13.0127 kada kWh ngayong Abril  mula sa P12.2901 kada kWh noong Marso. Nag-approba rin ang Metro Manila Waterworks and Sewerage System (MWSS) ng pagtaas na P0.04 kada cubic meter sa Manila Water’s Foreign Currency Differential Adjustment na P0.65 per cubic meter mula sa  P0.61 kada cubic meter noong unang quarter ng 2025. Kasamang umakyat ang health inflation ng 2.4% mula sa 2.2% noong nakaraang buwan.

Sa kabilang dako, bumaba ang transport ng -2.1% mula sa -1.1%, clothing and footwear  ng 1.6% mula sa 1.8, %, household furnishings and maintenance (2.1% mula sa 2.3%). Kasamang bumaba ang health (2.1% mula sa 2.3%) at transport (-1.1% mula sa -0.2%) ngunit umakyat nang bahagya ang information and communication (0.4% mula sa 0.3%).

Ang pagbaba ng transport ay dahil sa  patuloy na pagbagsak ng presyo ng Dubai crude oil sa US$66.89 kada bariles noong Abril kumpara sa $72.28 kada bariles noong Marso.  Bumaba ang presyo nito ng 25.2% kumpara sa $89.39 noong Abril 2024. Ito ay dahil sa paghina ng world economy na bunsod ng trade war na naghasik ng kadiliman sa paglago ng negosyo. Nagdesisyon din ang mga miembro ng OPEC na palaguin ang produksyon ng langis pagkatapos mag-away ang mga miembro tungkol dito. Ito ang mga dahilan kung bakit sa Dubai oil futures market na naireport sa Platts, pababa sa US$56.56 kada bariles ang quotes sa presyo nito sa Setyembre 2025.

Bumulusok  pababa  ang  month-on-month  (MOM) inflation sa -0.4%. Patuloy ang negatibong MOM inflation ng pagkain sa -1.4% mula sa -0.6% dahil sa -5.4% na pagdapa ng presyo ng gulay, -3.1% na pagbaba ng presyo ng bigas, -2.1% ng isda, -0.3% ng karne at 0.0% ng asukal.  Tanging gatas ang umakyat ng 0.1%.

Sa non-food category naman,  umakyat ang MOM inflation ng 0.3% mula sa di gumagalaw na 0.0%.  Nag-ambag dito ang patuloy na pagdapa ng  transport sa -0.5%% mula sa mas malalim na -0.7%. Ngunit, umakyat ng 0.2% ang housing water, electricity, gas and other fuels ng 0.1% mula sa 0.2%. Ganoon din ang clothing and footwear (0.1%). Di gumalaw ang health (0.2%); furnishings, household equipment, and routine maintenance (0.2%), at information and communication (0.1%)  sa mga antas nila noong nakaraang buwan.

Dahil ang naitalang inflation ay mas mababa kaysa sa  lower end ng target inflation range na 2-4%, inaasahang itutuloy ng BSP ang planong pagtapyas  sa interest rates sa ikalawang quarter ng taon. Ang mild na La Niña sa unang kalahati ng 2025 ay  naging maganda sa agrikultura at tumulong nang malaki sa pagbaba ng presyo ng pagkain. Inaasahang hihina ang pag-akyat ng inflation at mga mga ekonomiya sa mga advanced countries dahil sa uncertainty na bunsod ng trade war kaya bababa ang demand at suplay ng mga consumer items. Ngunit paminsan-minsan gulantangin ang mga presyo ng mga masamang balita tungkol sa palitan ng tariff increases, at ng mga kaguluhan sa Middle East kung saan galing ang malaking bahagdan ng suplay ng langis.