ALINSUNOD sa direktiba ni Pangulong Ferdinand R. Marcos Jr., nagtungo ang anim na miyembro ng gabinete, kabilang na ang ilang ministro ng Bangsamoro Autonomous Region in Muslim Mindanao (BARMM) sa Marawi City noong Biyernes, ika-11 ng Hulyo, 2025, para sa isang pagpupulong sa Camp Ranao, Marawi, Lanao del Sur.
Ang mga kalihim ay pinangunahan ni Presidential Adviser for Marawi Rehabilitation and Development Secretary Nasser Pangandaman Sr., kasama sina Secretary Amenah “Mina” Pangandaman ng Department of Budget and Management (DBM), Secretary Teodoro Herbosa ng Department of Health (DOH), Secretary Jose Ramon Aliling ng Department of Human Settlements and Urban Development (DHSUD), Secretary Manuel Bonoan ng Department of Public Works and Highways (DPWH), at Secretary Juan Edgardo “Sonny” Angara ng Department of Education (DepEd).
Si Secretary Pangandaman ay nagsisilbi rin bilang Co-Chair ng Intergovernmental Relations Body (IGRB) na nagtataguyod ng relasyon sa pagitan ng Bangsamoro regional government at ng national government.
Kabilang naman sa lumagda sa iba’t ibang kasunduan ang iba pang opisyal mula sa pambansang pamahalaan, na sina General Manager Joeben Tai ng National Housing Authority (NHA), General Manager Jay Daniel Santiago ng Philippine Ports Authority (PPA), Administrator Antonio Mariano Almeda ng National Electrification Administration (NEA), at National Director Elizer Salilig ng Department of Agriculture’s Bureau of Fisheries and Aquatic Resources (DA-BFAR).
Ang BARMM Ministers, na pinamumunuan ni BARMM Chief Minister Abdulrauf Macacua, ay kinabibilangan nina Minister Ubaida Pacasem ng Ministry of Finance, and Budget and Management, Minister Kadil Sinolinding Jr. ng Ministry of Health, Minister Hamid Aminoddin Barra ng Ministry of Human Settlements and Development, at Minister Muhammad Ameen Abbas ng Ministry of Transportation and Communications.
Nagtapos ang pulong sa paglagda ng mga sumusunod:
(1) Memorandum of Agreement sa pagitan ng DPWH at BARMM para sa pagsasaayos ng Access Bridge sa Norsalam Village;
(2) Memorandum of Agreement ng DPWH, DepEd, at BARMM para sa konstruksyon ng School Ancillary Facilities;
(3) Memorandum of Understanding sa pagitan ng NHA at BARMM para sa Building Better Marawi—Livable and Accessible Marawi Housing Program;
(4) Memorandum of Understanding sa pagitan ng DA at DA-BFAR kasama ang BARMM para sa Building Better Marawi—Aquaculture Industry Development;
(5) Memorandum of Understanding sa pagitan ng NHA at ng Marawi Compensation Board (MCB) para sa turnover ng compensation claims; at
(6) Acceptance Documents sa pagitan ng PPA at BARMM para sa turnover ng Marawi Port Facilities.
Bukod sa mga ito, ilan pa sa mga commitment na bunga ng pagpupulong ang pangakong suporta ng DepEd sa pagbibigay ng mga kagamitan sa Marawi Integrated School, pagtitiyak ng NEA ng suplay ng kuryente sa Marawi City General Hospital at mga karatig na lugar, at pagbibigay ng DOH ng suporta para sa pagkumpleto at operasyon ng Marawi City General Hospital.
Kasunod ng pagsasagawa ng pulong ang turnover ng 42 ambulansya ng DOH, na nagpapatibay sa emergency medical service ng lungsod.
Kabilang sa iba pang opisyal ng national government na dumalo sa mga aktibidad sina DBM Undersecretaries Margaux Salcedo at Wilford Will Wong, DepEd Undersecretaries Trygve Olaivar at Malcolm Garma, at DPWH Undersecretary Eugenio Pipo Jr.
