IKINALUGOD ni Senate President Pro Tempore Panfilo “Ping” Lacson ang Bangko Sentral ng Pilipinas (BSP) sa pagpapahigpit ng mga panuntunan sa malalaking cash withdrawal sa pamamagitan ng pagtatakda ng withdrawal limit na P500,000 kada banking day.
Ani Lacson, na namumuno sa Senate Blue Ribbon Committee na nag-iimbestiga sa korapsyon sa mga maanomalyang flood control projects, magiging abala ito para sa mga nagbibigay at tumatanggap ng suhol.
“Salute to BSP Governor (Eli) Remolona for issuing this circular. This will make it cumbersome to deliver large volumes of cash in SOP’s, commissions and payoffs from one corrupt government contractor or influence peddler to another corrupt government official,” ayon kay Lacson sa kanyang X account nitong Biyernes ng hapon.
Nitong Biyernes, inanunsyo ng BSP ang bagong regulasyon sa malalaking cash transaction para pigilan ang money laundering.
Batay sa Circular No. 1218 series of 2025 na inilabas noong Setyembre 18, lahat ng cash transaction na lalampas sa ₱500,000 o katumbas nito sa foreign currency ay dapat dumaan sa traceable channels gaya ng checks, online fund transfers, direct credit sa deposit accounts, o digital payments.
Ipinahayag din ng BSP na sakop din ng ganitong limit ang foreign currency transactions, at maaaring maabot ito sa isang transaksyon o kombinasyon ng ilang transaksyon sa loob ng isang banking day.
Sa ilalim ng circular, ang lahat ng BSP-supervised financial institutions ay kailangang magsagawa ng enhanced due diligence, at maghain ng suspicious transaction report, kung lalampas sa limit ang withdrawal. Maaari lamang payagan ang mas malaking halaga kung magbibigay ang kliyente ng dagdag na dokumento o patunay ng lehitimong negosyo.
Ipinunto ni Lacson na sa kanyang imbestigasyon sa flood control projects, nakatagpo siya ng malalaking suhol sa mga tiwaling opisyal, kabilang ang isang beses na cash delivery na umabot sa ₱457 milyon.
“Magiging cumbersome na yan sa maglalagay. Araw-araw maghuhulog siya ng ₱500,000. Kung ₱30 milyon ang lagay, ilang araw yan, masusundan siya ng Anti-Money Laundering Council at ng bank official,” ani Lacson sa panayam sa One News.
