PINANGUNAHAN ni Pangulong Ferdinand R. Marcos Jr. ang Unified Package for Livelihoods, Industry, Food, and Transport (UPLIFT Committee meeting nitong Martes sa Malakanyang, kung saan mas pinaigting ang mga hakbang bilang tugon sa epekto ng mataas na presyo ng langis.
Sinabi ni Presidential Communications Office Undersecretary and Palace Press Officer Claire Castro na binigyang-diin ng Pangulo ang pangangailangang palawakin ang mga interbensyon, na binanggit na bagama’t naghahatid ng mga positibong resulta ang mga kasalukuyang programa, patuloy pa ring sinusuri ang mga karagdagang hakbang upang higit pang mapabuti ang buhay ng mga Pilipino.
“Maliban sa mga nagawa ng mga programa at pagbibigay ng ayuda, layunin ng Pangulo na tukuyin ang iba pang mga posibleng hakbang para pagaanin ang pang araw-araw na buhay ng mga Pilipino sa kabila ng mga hamon na sama-sama nating hinaharap,” sabi ni Castro.
“Sa nasabing meeting, kampante ang Pangulo na ang kasalukuyang mga hakbang ng pamahalaan ay nananatiling aktibo at nagpapatuloy base sa pangangailan ng taumbayan,” dagdag pa niya.
Iniulat ni Castro na mahigit 24,000 Overseas Filipino Workers (OFWs) ang natulungan ng pamahalaan, kabilang ang higit 4,000 at ang 1,300 nilang dependents na narepatriate.
Tungkol sa suplay ng enerhiya, iniulat ni Castro na 471,000 bariles ng langis ang naihatid na sa bansa, habang 1 milyong bariles sa 2 milyong inorder ang nakumpirma na.
“As of today, April 21, nasa 52 days na ang average supply natin ng langis. Patuloy namang sinisiguro ng pamahalaan na mayroon tayong sapat na supply para tuloy-tuloy lang ang trabaho at mga serbisyo,” ulat ni Castro.
Para sa sektor na nasa ilalim ng matinding pangangailangan, sinabi ni Castro na mahigit 977,000 na mga drayber ng pampublikong sasakyan (PUV) ang nakinabang na sa programang Assistance to Individuals in Crisis Situations (AICS) ng Department of Social Welfare and Development. Samantala, mahigit 373,000 na ang nakatanggap ng subsidiya sa gasolina.
Mayroon ding 425 na mga drayber mula sa National Capital Region (NCR) na naging bahagi ng pilot program na TUPAD Tuloy Pasada, isang magkasanib na inisyatibo ng Department of Labor and Employment at ng Department of Transportation na naglalayong dagdagan ang kita ng mga drayber ng PUV na nahaharap sa mataas na gastos sa gasolina.
Upang matiyak ang matatag na suplay ng kuryente, minamadali rin ng gobyerno ang pagbuo ng 22 proyekto sa renewable energy na may pinagsamang kapasidad na 1,471 megawatts.
Binanggit din ni Castro na sa kasalukuyan, 86.89 porsiyento ng 665 na ahensya ng gobyerno ang sumusunod sa mga hakbang sa pagtitipid ng enerhiya, habang 2,933 na ahensya at entity ang nagpatibay ng mga flexible work arrangement upang mabawasan ang pagkonsumo ng gasolina at kuryente.
Patuloy din ang mga pagsisikap na patatagin ang mga presyo ng pagkain, kung saan walang price increase ang basic needs at prime commodities hanggang May 10.
Ang Bente Bigas Meron na ay inilunsad din sa 661 na mga site, na nakinabang ng higit sa 402,000 Pilipino sa buong bansa. May kabuuang 14.9 milyong kilo ang naibenta na sa mas mababang presyo sa mga mahihinang sektor. Halaw sa ulat ng Presidential News Desk