NILINAW ni Senador Erwin Tulfo nitong Lunes, Hunyo 8, 2026 na hindi pa maaaring ituring na isang opisyal na pagdinig ng Senate Blue Ribbon Committee ang isinagawang pagpupulong kaugnay ng kontrobersiya sa flood control projects ng pamahalaan dahil hindi pa kumpleto ang komposisyon ng komite sa ilalim ng bagong mayorya sa Senado.
Ang paglilinaw ay ginawa ng senador matapos isinagawang consultative meeting ng komite na nakatuon sa mga alegasyon ng iregularidad sa mga proyekto ng Department of Public Works and Highways (DPWH), kabilang ang umano’y anomalya sa paggastos ng pondo para sa flood control projects.
Kasabay nito, hindi rin humarap ang 18 bodyguards nainaasahang magbibigay ng impormasyon sa komite, habang nagpasya naman ang mga senador na tapusin nang mas maaga ang pagpupulong bilang pakikiisa sa mga naapektuhan ng magnitude 7.8 na lindol na tumama sa Mindanao.
Bakit hindi pa opisyal na hearing?
Ayon sa senador, hindi pa maaaring magsagawa ng pormal na hearing ang Blue Ribbon Committee dahil hindi pa ito ganap na organisado.
Ipinaliwanag niya na ayon sa mga tuntunin ng Senado, ang Committee on Accountability of Public Officers and Investigations o Blue Ribbon Committee ay dapat may kabuuang 17 miyembro, kabilang ang apat na kinatawan mula sa minority bloc.
Sinabi ni Tulfo, “Hindi pa sila talaga organized. Wala pa po silang mga miyembro. Kailangan po namin ng apat sa minority. Composition po ‘yan — 17. Wala pa po silang binibigay. So hindi po kami makapag-organize. Hindi po kami makapag-hearing.”
Dahil dito, sinabi niyang hindi pa maaaring tawaging opisyal na committee hearing ang isinagawa noong Lunes.
Dagdag pa niya, “So we cannot call this a hearing because matutulad din kami sa kanila last time na nag-hearing sila. Magiging sham hearing po.”
Ano ang “sham hearing”?
Ang sham hearing ay ginagamit upang ilarawan ang isang pagdinig na maaaring kuwestiyunin ang legalidad o pagiging balido dahil sa kakulangan ng kinakailangang proseso o awtoridad.
Ayon kay Tulfo, nais niyang tiyakin na ang lahat ng magiging hakbang ng komite ay naaayon sa mga patakaran ng Senado upang maiwasan ang anumang ligal na usapin sa hinaharap.
Tunggalian sa pamumuno ng Blue Ribbon
Ang usapin ay nag-ugat matapos ang pagbabago sa liderato ng Senado noong Hunyo 3.
Kasunod ng Senate reorganization, si Tulfo ang kinilalang pinuno ng Blue Ribbon Committee ng bagong mayorya.
Gayunman, iginiit naman ni Senadora Pia Cayetano na siya pa rin ang lehitimong chairperson ng komite.
Dahil dito, naging sentro ng usapan ang legalidad ng mga isinagawang pagpupulong ng magkabilang kampo.
Sinang-ayunan din ni Senador Francis Pangilinan ang paliwanag ni Tulfo na hindi pa maaaring magkaroon ng pormal na hearing hangga’t hindi pa nabubuo ang komposisyon ng komite.
18 bagman, dumating pero hindi humarap sa hearing
Isa sa mga pangunahing inaabangan sa pagpupulong ay ang pagharap ng 18 bagman na diumano’y nagdala ng male-maletang mga pera na may kaugnayan sa maanomalyang flood control projects.
Batay sa mga ulat, dumating sa Senado ang 18 umano’y dating mga marine na nais sanang tanungin ng komite.
Gayunman, sa halip na dumalo sa pagpupulong ni Tulfo, nagtungo sila sa opisina ni Senador Robin Padilla kasama ang kanilang abogado na si Atty. Levito Baligod.
Ayon kay Baligod, “Our reason is very clear, because the invitation is defective.”
Ipinahihiwatig nito na kinuwestiyon ng kanilang kampo ang legalidad ng ipinadalang imbitasyon.
Ayon kay Tulfo, ipinadala pa nila ang Senate Secretariat sa opisina ni Senador Padilla matapos nilang malaman na naroon ang mga naturang indibidwal.
Gayunman, sinabi niyang pinaghintay lamang ang kanilang mga tauhan nang halos isang oras.
Ayon kay Tulfo,“We sent our Senate secretariat and asked Senator Robin… his staff. Sabi sandali lang. One hour pong pinag-antay.”
Dagdag pa niya, “Sana nagsabi sila, mag-a-attend kami, pupunta kami. Talagang inaabangan din nila.”
Aniya, hindi maaaring manatiling naghihintay nang walang katiyakan ang komite.
“Ano ang gagawin namin? Uubusin namin ang oras kaaantay sa kanila. Paano kung natapos sila nang 12 o’clock, 1 o’clock, 2 o’clock, we’ll wait for them? Hindi naman po puwede.”
Walang contempt order sa ngayon
Nilinaw rin ni Tulfo na hindi maaaring maglabas ng contempt order ang kanyang grupo laban sa mga hindi dumalong resource persons.
Ang contempt ay isang kaparusahan na maaaring ipataw ng Senado laban sa isang taong tumatangging sumunod sa isang ligal na utos o hindi tumatalima sa proseso ng isang pagdinig.
Subalit ayon kay Tulfo, dahil hindi pa opisyal na organisado ang komite, wala pa silang kapangyarihang gamitin ang naturang remedyo.
Tulfo handang mag-inhibit
Isa sa pinakamahalagang development matapos ang pagpupulong ay ang pahayag ni Tulfo na handa siyang mag-inhibit sa sandaling magkaroon ng pormal na pagdinig.
Ito ay matapos mabanggit ang kanyang pangalan sa ilan sa mga alegasyong lumutang sa kontrobersiya.
Ayon kay Tulfo, “Definitely, ‘yung sinasabi nila na mag-i-inhibit, definitely mag-i-inhibit ako. Kapag sa proper hearing, I will announce I will inhibit.”
Ano ang Inhibition?
Ang inhibition ay kusang pag-atras o hindi paglahok ng isang opisyal sa isang kaso o imbestigasyon upang maiwasan ang anumang pagdududa sa pagiging patas ng proseso.
Ayon kay Tulfo, nais niyang matiyak na walang magiging kuwestiyon sa kredibilidad ng magiging imbestigasyon kapag nagsimula na ang pormal na hearing.
Leviste nag-alok ng tulong sa imbestigasyon
Kasabay ng mga pangyayari sa Senado, ibinahagi rin ng tanggapan ni Tulfo ang liham ni Batangas Representative Leandro Leviste na may petsang Hunyo 5.
Sa liham, nagpahayag si Leviste ng kahandaang tumulong sa imbestigasyon at magbigay ng impormasyon kaugnay ng flood control projects at iba pang proyekto ng Department of Public Works and Highways (DPWH).
Ayon kay Leviste: “I would like to present information relevant to this at your earliest convenience. I would appreciate being informed by your office if this may be possible.”
Dagdag pa niya, “I remain available to assist in any investigation on flood control projects and other projects of the Department of Public Works and Highways.”
Si Leviste rin ang naunang nagsabing hawak niya ang tinatawag na “Cabral files,” na umano’y naglalaman ng mga dokumentong may kaugnayan sa 2025 infrastructure budget insertions.
Pagpupulong itinigil dahil sa malakas na lindol
Hindi nagtagal ang pagpupulong matapos magpasya ang mga senador na ituon ang kanilang atensyon sa mga naapektuhan ng magnitude 7.8 na lindol sa Mindanao.
Ayon kay Senador JV Ejercito, “Kahit na nag-he hearing kami kanina rito hindi maalis sa isip namin [sa biktima ng lindol].”
Dagdag pa niya, “Kaya nga pinutol na para matignan din kung paano tayo makakatulong sa ating mga kababayan doon.”
Samantala, sinabi naman ni Senador Win Gatchalian, “In due deference to Mindanao, tsaka lakas ang earthquake doon… Daming devastation. So sabi namin na isu-suspend na muna dahil wala rin naman ‘yung 18 bodyguards.”
Ayon pa kay Gatchalian, naghahanda rin ang ilang senador ng ayuda para sa mga naapektuhang komunidad sa Mindanao.
Mga susunod na hakbang
Sa kabila ng hindi pagdalo ng 18 umano’y bagman, sinabi ni Tulfo na hindi pa natatapos ang usapin.
Ayon sa senador, “Mas importante ba itong pagtestimonya ng 18 dating marines? Makakapag-antay naman ito. Babalikan natin sila. Then imbitahan naman natin ulit sila.”
Sa kasalukuyan, hinihintay pa ang pormal na organisasyon ng Blue Ribbon Committee sa ilalim ng bagong mayorya.
Kapag nakumpleto ang komposisyon nito, inaasahang magsasagawa ng opisyal na pagdinig ang komite upang talakayin ang mga alegasyon kaugnay ng flood control projects, kabilang ang testimonya ng mga resource persons, mga dokumentong may kaugnayan sa kontrobersiya, at iba pang impormasyong maaaring makatulong sa imbestigasyon.
Sa ngayon, malinaw ang posisyon ni Tulfo, ang isinagawa noong Hunyo 8 ay isang consultative meeting at hindi pa isang opisyal na Blue Ribbon hearing, habang nagpapatuloy ang paghahanda para sa susunod na yugto ng imbestigasyon ng Senado.