ISA ang W.L. Foods Corporation sa Valenzuela City sa inireklamo ng mga manggagawa nila sa Raffy Tulfo in Action (RTIA) dahil sa umanoy’s unfair labor practice.
Nang dahil dito ay ipinarating ng RTIA sa Department of Labor and Employment (DOLE) ang sumbong at agad din namang nagkasa ang DOLE ng inspeksyon kasama ang Senate team ni Sen. Idol Raffy Tulfo na Vice Chairman ng Senate Committee on Labor and Employment.
Sa nasabing inspeksyon, nakumpirma ng DOLE at Senate team ni Sen. Idol ang mga sumbong pagdating nila sa W.L. Foods. Isa sa mga empleyado roon na nakausap ng DOLE ang nagsabi na mahigit isang taon na siya sa kumpanya pero casual pa rin siya at ₱400 lamang ang kanyang sweldo kada araw.
Ilan naman sa mga manggagawa roon na pakyawan at kumikita ng ₱700 kada araw ang nagsabing kinailangan daw nilang magtrabaho ng hanggang dose oras para sa halagang ito.
Pero ayon sa National Wages Productivity Commission (NWPC), wala sa listahan ang W.L. Foods sa nabigyan ng permiso ng NWPC para magpatupad ng piece rate o pakyawan sa kanilang kumpanya.
Ibig sabihin, sa matagal nang panahon ay nalulugi sa overtime pay ang mga manggagawang pakyawan sa W.L. Foods sa halagang ₱348 kada araw. Dahil sa ginawang computation ng DOLE base sa minimum wage, kapag dose oras nagtrabaho ang isang empleyado sa isang araw, kailangan ang maging kapalit nito ay ₱1,048.
Agad na hiniling ni Sen. Raffy sa DOLE na laliman pa ang kanilang imbestigasyon sa W.L. Foods para sa iba pang posibleng labor violations nito at inobliga niya rin ang kumpanya na ibigay ang back wages ng kanilang mga manggagawa sa nalugi nila dahil sa pakyawan at mga casual workers na pinasasahuran ng below sa minimum wage.
Gayunpaman, agad na ipinatitigil ng DOLE sa W.L. Foods ang pagpapatupad nito ng pakyawan system sa kanilang kumpanya hanggat hindi sila nakakakuha ng permit mula sa NWPC.
Sa Senate consultative meeting na pinangunahan ni Sen. Raffy kahapon, sinabihan niya naman ang legal counsel ng W.L. Foods na paalalahahan ang kliyente niya na bayaran ang mga obligasyon nito sa kanyang empleyado, na sinangayunan naman nito.
