HABANG naghahanda ang milyun-milyong Pilipino para sa taimtim na pagdiriwang ng Semana Santa, nanawagan si Pangulong Ferdinand R. Marcos Jr. sa bansa na gamitin ang oras na ito upang sariwain ang kanilang pangako sa pagbuo ng isang bansang nakabatay sa pananampalataya at walang pag-iimbot na paglilingkod sa kapwa.
“May this Holy Week strengthen our resolve to become a nation guided by faith, united in purpose, and inspired by selfless service,” sabi ng Pangulo sa kanyang mensahe.
Hinimok ng Pangulo ang mga Pilipino na “maglaan ng sandali para sa maikling paghinto, pamamahinga, at pagninilay-nilay” sa panahon ng sagradong panahon.
Hiniling ni Pangulong Marcos sa mga Pilipino na alalahanin ang di-masukat na pag-ibig ni Hesukristo, na ang paglalakbay mula Jerusalem patungo sa Krus at Pagkabuhay na Mag-uli ay sumasalamin sa isang pag-ibig na yumayakap sa pagdurusa ng tao at nagtatagumpay laban sa kamatayan.
“The Passion of Christ reminds us that true greatness is not found in power, but in sacrifice; not in privilege, but in service; and not in comfort, but in the courage to carry the burdens of others,” sabi ng Pangulo.
Hinimok ng Punong Ehekutibo ang mga Pilipino na panibaguhin ang kanilang pangako sa pagmamahal at paglilingkod sa isa’t isa, lalo na sa panahon ng kahirapan, at manatiling matatag sa pananampalataya sa kabila ng mga hamon sa buhay.
Idinagdag ni Pangulong Marcos na ang halimbawa ni Hesukristo ay dapat magbigay-inspirasyon sa publiko na harapin ang kanilang sariling mga hamon “nang may kababaang-loob, tiyaga, at pag-asa.”
“For in every act of compassion, every hand extended to those in need, and every sacrifice made for the good of others, we keep alive the spirit of His message,” sabi ng Pangulo.
Hinikayat din ni Pangulong Marcos ang mga Pilipino na magkaisa upang isulong ang kapakanan ng mga pamilya, palakasin ang mga komunidad, at bumuo ng “isang mas mahabagin at maunlad na Bagong Pilipinas.”
“I wish everyone a meaningful and blessed Holy Week,” pagtatapos ng Pangulo. Halaw sa ulat ng Presidential Communications Office sa pamamagitan ng Presidential News Desk
