UMAPELA muli si Senator Robinhood “Robin” Padilla ngayong Martes, Setyembre 17, 2024 sa mga ahensya ng pamahalaan na gawin ang lahat para magbigay ng pansamantalang kalinga para sa mga refugees at stateless persons – lalo na’t nagpahayag ng suporta para sa kanyang panukalang batas ang Department of Justice at Commission on Human Rights.
Ani Padilla, na naghain ng Senate Bill 2548 noong Pebrero para palakasin ang proteksyon para sa mga refugee, mismong Saligang Batas ang basehan ng pagbigay ng tulong sa mga refugees.
“Sana po pakiusap ko po sa atin pong mga bisita ngayon, kayo po ang mas nakakaalam kung anong pwede natin gawin. Sana huwag natin kalimutan na ang ating Constitution ang unang una ang preamble niyan ay pananampalataya natin sa Diyos. Pag sinabi natin tayo naniniwala sa Diyos, kasunod niyan ang pagmamahal natin sa kapwa, maging Pilipino man o hindi,” giit niya sa pagdinig ng Committee on Justice and Human Rights.
“Kaya sana po sa pamamagitan po ng panukala na ito, maging malinaw po ang pwede nating gawin dito sa ating mga kababayan at doon sa mga humihingi din ng pansamantalang pagkalinga natin. Kasi hindi naman lingid sa ating kaalaman na meron ding mga Afghans na humihingi po ng pansamantala, pansamantala na dumaan sa atin habang pinoproseso. At ganoon din ang Palestino mga Pilipino na may asawang Palestino na nandito ngayon na hindi alam nila anong mangyayari sa kanila,” dagdag niya.
Ihinain ni Padilla noong Pebrero ang Senate Bill 2548 na sumasang-ayon sa Sec. 11, Art. II ng 1987 Constitution kung saan pinapahalagahan ng Estado ang dignidad ng bawa’t tao at tinitiyak ang paggalang sa kanilang mga karapatan.
Ayon kay Padilla, naging tahanan ang Pilipinas sa mga migrant at refugee simula noong 1980s, kabilang ang mga Jews noong administrasyon ni Pangulong Manuel Quezon at mga Vietnamese noong administrasyon ni Pangulong Ferdinand Marcos Sr.
“Ngayon medyo kumplikado ang sitwasyon dahil sa mga usapin po at kinatatakutan ng tao na sinasabi na baka mapasukan tayo ng terorista, mapasukan tayo ng masasamang loob. Yan naman po ay nakasalalay sa enforcement. Huwag naman po natin sana isisi sa taong nangangailangan ng kalinga,” aniya.
Nagpahayag naman ng suporta ang Department of Justice at Commission on Human Rights sa panukalang batas ni Padilla.
Muling iginiit ni Padilla na kailangang matulungan ang mga refugees at stateless, tulad ng mga Tausug sa Sabah; at ang mga Afghans at Palestinians na asawa ng Pilipino.
“Sana huwag natin kalimutan na ang ating Constitution ang unang una ang preamble niyan ay pananampalataya natin sa Diyos. Pag sinabi natin tayo naniniwala sa Diyos, kasunod niyan ang pagmamahal natin sa kapwa, maging Pilipino man o hindi,” aniya.
