NITONG Marso 28, 2025, naglunsad muli ang isang kontrobersyal na protesta ng Overseas Filipino Workers (OFWs) at isinabay ito sa “Zero Remittance Week.”
Ayon sa kasaysayan, dalawang beses nang ginawa ito ng mga OFW: noong 2008 at 2015 kung saan nag-protesta sila para sa kanilang mga karapatan. Basahin ang kaugnay na istorya sa ibaba ng artikulong ito.
Ang layunin ng protesta ay ipakita ang kanilang galit at pagkadismaya sa pag-aresto kay dating Pangulong Rodrigo Duterte, na kinasasangkutan ng mga kasong krimen laban sa sangkatauhan ukol sa kanyang war on drugs. Kasama ang mga OFW groups, inilunsad ang petisyong itigil ang pagpapadala ng remittances mula Marso 28 hanggang Abril 4, 2025.
Ang mga remittances mula sa mga OFWs ay may malaking epekto sa ekonomiya ng Pilipinas, kaya’t pinaniniwalaan ng ilang ekonomista na ang planong ito ay magdudulot ng mga epekto sa ekonomiya kung magtatagumpay.
Ngunit may mga argumentong nagsasabing ito ay isang “empty threat” lamang. Sa artikulong ito, tatalakayin ang mga aspeto ng “Zero Remittance Week,” pati na ang posibleng epekto nito sa ekonomiya at ang mga saloobin ng mga eksperto at aktibista hinggil sa isyung ito.
Paano nabuo ang kasalukuyang protesta?
Nitong Marso 25, iba’t ibang grupo ng mga Overseas Filipino Workers (OFWs) ang nagtipon-tipon sa Malieveld Park sa The Hague, at nagprotesta sa tapat ng International Criminal Court (ICC) at ipinagsigawan na ibalik si dating Pangulong Rodrigo Roa Duterte sa Pilipinas.
Sa panahon ng protesta, pinipili ng mga OFWs na huwag magpadala ng remittances o pera sa kanilang mga pamilya sa Pilipinas mula Marso 28 hanggang Abril 4. Ang remittances ng mga OFWs ay isang mahalagang bahagi ng ekonomiya ng Pilipinas. Katunayan, umabot sa pinakamataas na $38.34 bilyon ang ipinadala o remittances ng mga OFW sa Pilipinas noong Disyembre 2024 , ayon sa Bangko Sentral ng Pilipinas (BSP).
Noong 2024, ang remittances ng mga OFW ay umabot sa 8.3 porsiyento ng Gross Domestic Product (GDP) at 78.4 porsiyento ng Gross National Income (GNI) na nagpapatunay ng kahalagahan ng OFWs remittances bilang isa sa nagpapasulong ng ekonomiya ng Pilipinas.
Epekto ng ‘Zero Remittance Week’ ayon sa mga eksperto
Ayon kay Jun Neri, isang lead economist mula sa BPI (Bank of the Philippine Islands), ang “zero remittance week” mula Marso 28 hanggang Abril 4, 2025 ay maaaring magdulot ng mga epekto sa ekonomiya ng Pilipinas, partikular na sa mga pamilya ng mga OFWs.
Ang mga remittances o padala ng mga OFW ay isang mahalagang bahagi ng ekonomiya ng bansa, at ang pagkakaroon ng pagbaba sa remittances ay maaaring magdulot ng mga problemang pinansyal sa mga pamilya sa Pilipinas.
Kung hindi maipapadala ang karaniwang remittances ng mga OFW sa loob ng isang linggo, maaaring magdulot ito ng pagkaantala sa pang-araw-araw na gastusin ng mga pamilya, tulad ng bayarin sa mga utilities, matrikula, at iba pang mga obligasyon.
Ayon kay Marco Javier, isang ekonomista at strategist mula sa BPI, ang mga remittances mula sa mga OFWs ay nag-aambag ng $97.3 milyon araw-araw sa ekonomiya ng Pilipinas.
Ito ay isang malaking halaga na tumutulong sa paglago ng ekonomiya, partikular sa household consumption o ang gastusin ng mga pamilya. Ang pagpapahinto ng remittances sa isang linggo, kung magiging matagumpay, ay maaaring magdulot ng epekto sa household spending at makakaapekto sa mga desisyon ng mga bangko tulad ng Bangko Sentral ng Pilipinas (BSP) na magtakda ng interest rates.
Ang mga OFW ay isa sa mga pangunahing pinagmumulan ng foreign exchange o dolyar, na ginagamit ng gobyerno upang magbayad ng mga importasyon, utang, at iba pang obligasyon sa ibang bansa.
Ayon kay Neri, ang pagbaba ng remittances ay magdudulot ng pagtaas ng foreign exchange rates at maaaring magresulta sa mas mataas na interest rates, na makakaapekto sa mga pinansyal na transaksyon sa bansa. Kung magpapatuloy ang pagbaba ng remittances, maaaring humirap ang pagpapautang, at magiging mas mahal ang pagpapahiram sa mga kababayan.
Pagtingin sa ‘Zero Remittance Week’: Isang ‘Collective Action Problem’
Gayunpaman, may mga eksperto na nagsasabing ang “Zero Remittance Week” ay isang hindi epektibong protestang hakbang.
Ayon sa ilang mga ekonomista, ito ay tinatawag na “collective action problem.” Sa madaling salita, ang layunin ng “Zero Remittance Week” ay mangangailangan ng pagkakaisa ng mga OFW upang tumigil sa pagpapadala ng remittances. Ngunit naniniwala ang mga eksperto na may mga hindi susunod sa protestang ito dahil ang bawat OFW ay may personal na interes na hindi mawalan ng padala ang kanilang mga pamilya sa Pilipinas.
Kung ang bawat isa ay maghihintay na lamang na ang iba ang magsimula ng protestang ito, hindi magiging epektibo ang pagkilos.
Dahil dito, ilan sa mga eksperto, tulad ni Neri, ay hindi naniniwala na magiging matagumpay ang “Zero Remittance Week.” Ayon sa kanila, ang mga OFW na tumigil magpadala ng pera ay posibleng magpadala pa rin ng pera sa ibang linggo o ibang panahon na hindi gaanong makakaapekto sa kabuuang ekonomiya.
Komento ng ilang eksperto at opisyal ukol sa ‘Zero Remittance Week’
Ayon kay Chief Presidential Legal Counsel Juan Ponce Enrile, ang mga OFW na sasali sa “zero remittance week” ay maaaring humarap sa mga posibleng epekto, tulad ng pagkawala ng mga tax privileges.
Si Economist at UP Professor Benjamin Diokno naman ang nagsabi na ang “zero remittance week” ay hindi magdudulot ng malalim na pangmatagalang epekto sa ekonomiya ng Pilipinas, dahil hindi na kasing-depende ang bansa sa remittances ng mga OFW kumpara noong nakaraan.
Sa kabilang banda, sinabi ni Vice President Sara Duterte na may karapatan ang mga OFWs na magpahayag ng kanilang opinyon at pagkilos.
Kasaysayan ng ‘Zero Remittance Day’
Bago ang kasalukuyang isyu ng “Zero Remittance Week,” mayroong kasaysayan ng mga pagsisikap ng mga migranteng Filipino na mag-protesta gamit ang paghinto ng pagpapadala ng remittances. Noong 2008 at 2015, ang Migrante International at ang International Migrants Alliance ay nagsagawa ng mga “Zero Remittance Day” bilang protesta laban sa mga polisiya at mga isyu na nakakaapekto sa mga OFW.
Noong 2008, ang protesta ay nag-ugat mula sa mga alegasyon ng maling paggamit ng pondo ng Overseas Workers Welfare Administration (OWWA) at ang mataas na bayarin ng mga recruitment agency.
Samantala, noong 2015, ang Zero Remittance Day ay ipinagdiwang upang tutulan ang mga plano ng Bureau of Customs na random na inspeksyon ng mga balikbayan boxes at ang kakulangan sa proteksyon ng mga OFW mula sa abuso.
Ang kasaysayan ng mga protesang ito ay nagpapakita ng layunin ng mga OFW na protektahan ang kanilang mga karapatan at kagalingan, hindi para ipagtanggol ang isang lider na may kontrobersiyal na nakaraan tulad ni Duterte.
Pananaw ng Migrante International
Samantalang ang ilang OFW groups ay nagsusulong ng “Zero Remittance Week” bilang isang protesta laban sa pag-aresto kay Duterte, ang Migrante International, isang aktibistang grupo ng mga migrante, ay hindi pabor sa ganitong uri ng protesta.
Ayon kay Josie Pingkihan, ang deputy secretary ng Migrante, ang Zero Remittance Day ay orihinal na layunin upang ipaglaban ang mga karapatan at kapakanan ng mga OFW, hindi para ipagtanggol ang isang “kriminal” na lider.
Iginiit ng mga aktibistang mula sa Migrante na si Duterte ay hindi karapat-dapat na ipagtanggol ng mga OFWs.
Ayon kay Pingkihan, si Duterte ay naging sanhi ng maraming problema para sa mga pamilya ng OFWs, tulad ng pag-apruba ng mga polisiya na nagdulot ng pahirap sa mga migranteng manggagawa. Isang halimbawa na binanggit ni Pingkihan ay ang paglagda ni Duterte sa batas na nag-aatas ng advance payment ng Social Security System (SSS) para sa mga OFWs, isang hakbang na kamakailan ay idineklarang “unconstitutional” ng Supreme Court. May dagdag na ulat ni Lea Manto-Beltran