PINANGUNAHAN ni Pangulong Ferdinand R. Marcos Jr. nitong Miyerkules ang panunumpa sa tungkulin nina Acting Executive Secretary Ralph Recto at Acting Finance Secretary Frederick Go.
Ginanap ang seremonya ng panunumpa sa Study Room ng Palasyo ng Malacañan.
Sa anunsyo ng mga bagong talagang opisyal noong Martes, binigyang-diin ni Presidential Communications Undersecretary at Palace Press Officer Claire Castro ang matatag na rekord nina Recto at Go sa larangan ng polisiya, pamahalaan, at mga inisyatibong pang-ekonomiya.
Ayon kay Castro, ang malawak na karanasan ni Recto sa paggawa ng polisiya sa ekonomiya, batas sa pananalapi, at pambansang pagpaplano ay nagpapakita ng kanyang kakayahan na pamahalaan ang mga operasyon ng gobyerno at pangasiwaan ang pagpapatupad ng mga pangunahing programa.
Nauna nang nagsilbi si Recto bilang Finance Secretary at miyembro ng Monetary Board. Naging Socioeconomic Planning Secretary rin siya at Director-General ng National Economic and Development Authority (NEDA) noong 2008.
Samantala, si Go, na dating Special Assistant to the President for Investment and Economic Affairs, ay naging mahalagang bahagi sa pagpapalakas ng pamumuhunan, pagtitiyak ng tiwala ng mga mamumuhunan, at pagsasaayos ng mga inisyatibong pang-ekonomiya sa iba’t ibang ahensya.
Ngayon, siya ang may pananagutan sa pagtutok sa direksyong pananalapi ng bansa at pagpapatupad ng mga layunin ng administrasyong pang-ekonomiya.
Bago ang kanyang pagtatalaga sa gobyerno, si Go ay humawak ng mga pangunahing posisyon sa pribadong sektor, kabilang ang pagiging Pangulo at Chief Executive Officer (CEO) ng Robinsons Land Corporation, Chairman ng RL Commercial REIT, Inc., at Chairman/Vice Chairman ng Luzon International Premier Airport Development (LIPAD) Corp.
Ayon pa kay Castro, ang mga pagbabagong ito sa pamunuan ay nagpapakita ng dedikasyon ni Pangulong Marcos sa pagpapalakas ng mga institusyon, pagpapabuti ng koordinasyon sa pamahalaan, at pagtitiyak na ang administrasyon ay nakatuon sa pagbibigay ng “katatagan, oportunidad, at seguridad” para sa mga Pilipino. | PND
