BINATIKOS ni Senate Minority Leader Alan Peter Cayetano ang Department of Health (DOH) at Philippine Health Insurance Corporation (PhilHealth) dahil sa aniya’y false advertising o maling impormasyon tungkol sa tunay na saklaw ng No Balance Billing (NBB) policy.
Aniya, hindi masisisi ang publiko sa kanilang pagkalito dahil hindi tumutugma ang pangalan ng programa sa totoong nararanasan ng mga pasyente sa mga ospital.
“Hindi ‘no balance’ iyon. Isn’t that false advertising” wika ng senador kay Senador Pia Cayetano na sponsor ng panukalang 2026 DOH budget sa plenary debates sa Senado nitong November 27, 2025.
Sabi pa niya, lalong nalito ang mga mayor, local health officials, at taumbayan pagkatapos ng State of the Nation Address kung saan sinabi ni Pangulong Ferdinand Marcos Jr. na wala nang babayaran ang ating mga kababayan sa mga pampublikong ospital.
Hanggang ngayon, hindi malinaw kung ano talaga ang saklaw at mga patakaran ng polisiyang ito. Para linawin ang isyu, pansamantalang sinuspinde ng Senado ang plenary rules para mismong si Health Secretary Ted Herbosa ang makasagot sa mga tanong ni Cayetano.
Paliwanag ni Herbosa, ang Zero Balance Billing ay para lang sa DOH-retained hospitals at para sa lahat ng pasyente ng basic wards. Samantala, ang NBB ay para lang sa indigent patients at dapat pasok sa PhilHealth case rate limits.
Dagdag pa niya, may nakatakdang halagang binabayaran ang PhilHealth sa case rates sa bawat ospital o doktor para sa isang partikular na sakit o procedure. Iyon lamang, madalas ay ay hindi ito sapat kumpara sa totoong gastos sa ospital.
Nagbabala si Cayetano na nakasisira sa tiwala ng publiko ang mga termino na hindi naman tugma kung paano ito talagang ipinapatupad.
Binanatan din niya ang PhilHealth dahil mula 2017 ay hindi na ito nag-update ng case rates, na siyang dahilan kung bakit hindi maayos ang NBB ayon sa ipinapangako nito.
“Ang basis ng conversation is trust, so if you tell people na ‘no balance’ pero may balance, why would they name it ‘no balance’ kung may balance?” wika ng senador.
Kahit tumaas pa raw sa 80% ang sakop ng halos lahat ng case rate packages ng PhilHealth, marami pa ring procedure ang kulang ang pondo, kaya napipilitan pa ring magbayad ang mga pasyente.
“Garbage in is garbage out… we cannot really tell people na ize-zero billing namin kayo (without accurate costing). We cannot promise people then not deliver,” aniya.
Kaya hinimok ni Cayetano ang gobyerno na tigilan ang sobrang pagpapaasa at pangako kung hindi naman natutupad ang mga ito sa healthcare programs.
“We cannot keep announcing programs that confuse the public and fail them in practice. Either i-no balance nila talaga or palitan nila y’ung pangalan,” sabi niya.
<strong>‘Laging delayed, halos expired na mga bakuna’</strong>
“It’s unacceptable! Kailan magbabago ‘yan?!”
Ito ang mariing tanong ni Senate Minority Leader Alan Peter Cayetano nitong Miyerkules sa DOH nang punahin niya ang laging delayed na pagdating ng libreng bakuna sa mga health center.
“Health ng mga bata ito. Future ng bansa ito. Budget n’yo ang laki-laki tapos y’ung on time lang y’ung bakuna [hindi niyo magawa],” punto ni Cayetano sa plenary debate para sa proposed 2026 budget ng ahensya noong November 26.
Ayon sa senador, kung hindi delayed ang mga bakunang dumadating galing sa DOH, kulang o halos expired na ang mga ito, kabilang ang mga bakuna para sa routine immunization ng mga sanggol.
“Let’s randomly call ten mayors and governors, they’ll all tell you the same thing: the DOH is not delivering enough, tapos ‘pag nag-deliver, late at ready to expire na,” aniya.
“Y’ung ibang parents ayaw nang pabakunahan ang anak nila kasi one month na lang expired na eh!” dagdag niya.
Hindi tinanggap ni Cayetano ang aniya’y “pambobola” ng DOH na logistics at sobrang kumpetisyon sa bidding ang dahilan ng problema.
“All around the world, ang flu vaccine, ibinibigay sa matatanda ng March at April. Even assuming na nanggagaling pa sa Western countries at sabihin mong dumating dito ng August o July, ngayong November na wala pa rin silang vaccine for flu, and it expires on December 31,” pahayag ng senador.
“Hindi dapat magkaroon ng problema sa bidders,” dagdag niya. “[Kung] may mga sira-ulong bidder diyan na loloko-lokohin y’ung bidding, ‘di ipakulong niyo.”
Sabi pa ng Minority Leader, na ang asawa ay alkalde ng Taguig, gustuhin man ng local government units na sila na ang bumili ng mga bakuna ay hindi nila ito magawa dahil may mga bakunang tanging ang national health agency lang ang maaaring mag-procure.
Pinuntirya rin ni Cayetano si Health Secretary Ted Herbosa dahil sa puro “excuses” aniya nito at sa mabagal na aksyon.
“Ever since Secretary Herbosa took over, it’s late or kulang… Two years na, parating late!” pahayag niya.
Hinamon niya ang kalihim na ayusin ang problema bago mag-2026.
“Can you guarantee us in 2026 there will be no delays? Because if not, let’s get a secretary who can,” giit ng senador.
