“Kailangan padaliin ang pamumuhay ng Pilipino. Dahil ang sistema ay kailangan nagdadala ng ginhawa sa tao, hindi sakit ng ulo.”
Binigyang-diin ni Pangulong Ferdinand R. Marcos Jr. nitong Linggo ang pangangailangang gawing moderno ang mga lumang sistema at pabilisin ang digitalisasyon upang gawing mas maginhawa ang mga serbisyo ng gobyerno at mapangalagaan ang responsable at produktibong mga mamamayan.
Sa kanyang pinakahuling BBM VLOG, hinikayat ni Pangulong Marcos ang publiko na magbahagi ng mga mungkahi para sa mga bagong patakaran upang matugunan ang mga mahahalagang isyu.
“Dito sa ating bansa, marami pang polisiya ang kailangan natin baguhin at ribisahin. Nakikita natin sa balita at naririnig natin ang mga kababayan natin, ang kanilang mga reklamo,” ayon sa Punong Ehekutibo.
Sinabi ng Pangulo na ang mga patakaran ay epektibo kapag ang mga ito ay malinaw, maipapatupad, at tunay na nagpapadali sa pang-araw-araw na buhay para sa mga tao—mula sa disiplina at kalusugan ng publiko hanggang sa paghahatid ng serbisyo at kadalian ng pagnenegosyo.
Binanggit ang mga halimbawa mula sa ibang mga bansa, sinabi ni Pangulong Marcos na ang mga patakarang nakatuon sa disiplina ay may mahalagang papel sa paghubog ng maayos at responsableng mga lipunan.
Binanggit din ng Pangulo ang mga makabagong patakaran sa paggawa at kalusugan na pinagtibay ng ibang mga bansa upang mapalakas ang produktibidad, mabawasan ang burnout, at mapabuti ang kalusugan ng publiko.
“Maganda lahat ‘yan. ‘Yang sa road courtesy, kailangan natin ‘yan. Pati ‘yung sa kalusugan, kailangan din natin ‘yan. Pero ang tingin ko, kailangan natin tutukan ang mga lumang polisiya na nagpapabagal at nagpapahirap sa mga government transaction, sa ease of doing business, ‘ika nga,” diin ng Pangulo.
Ilan sa mga halimbawa ng mga lumang patakaran ay ang paghingi ng ID para makapag-apply ng ID, pagpuno ng dose-dosenang mga form na nangangailangan ng parehong impormasyon, at paghingi ng pisikal na anyo sa mga transaksyong maaaring digital, ayon sa Pangulo.
Sinabi ni Pangulong Marcos na may malinaw na solusyon sa matagal nang kawalan ng kahusayan sa mga serbisyo ng gobyerno, tulad ng paggamit ng eGovPH app at ang digitalisasyon ng mga sistema ng gobyerno.
Binanggit ng Pangulo ang ilang halimbawa ng mabubuting patakaran, tulad ng pagsuspinde ng Land Transportation Office (LTO) sa pisikal na pagkumpiska ng lisensya sa pagmamaneho at pagkilala sa digital na lisensya; mga Beep card ng LRT at MRT para sa 50 porsyentong diskwento para sa mga estudyante, senior citizen, at mga taong may kapansanan; promo para sa pamilya ng LRT at MRT tuwing Linggo; pagpapalawak ng zero billing policy upang masakop ang mga nasa gitnang uri; at libreng Wi-Fi sa mga istasyon ng LRT at MRT.
Binigyang-diin din ng Pangulo ang kahalagahan ng aktibong kooperasyon ng mga tao sa pagpapatupad ng mabubuting patakaran.
“Ang mga polisiya ay kultura na isinusulat bilang batas. Ipaalam ninyo sa amin sa comment section kung may mga mungkahi kayong polisiya na makakatulong solusyonan ang marami nating problema. Aabangan namin ang mga suggestion ninyo,” President Marcos said. Halaw sa ulat ng Presidential News Desk