HABANG nagpapatuloy ang manhunt operations kay Atong Ang, inanunsyo ni Interior and Local Government Secretary Jonvic Remulla na ang pabuya para sa impormasyon na maghahatid sa kanyang pagkakaaresto ay dinoble mula 10 milyon patungong 20 milyong piso upang mas mapabilis ang kanyang pagkakahuli.
“We are increasing the bounty for Atong Ang to 20 million pesos for information leading to his arrest,” sabi ni Remulla.
Nagpahayag ng kumpiyansa ang hepe ng DILG na ang dagdag na gantimpala ay maghihikayat ng kooperasyon mula sa mga maaaring nakakaalam ng kinaroroonan ng pugante.
“Kung pumatay ka ng isang-daang tao at may bilyon-bilyong pera kang nakatago, darating din ang araw mo,” paliwanag ni Remulla at sinabing ang pagtaas ng pabuya ay magpapabilis sa proseso para harapin ni Ang ang kanyang mga kaso bilang pangunahing suspek sa kaso ng mga nawawalang sabungero.
Sinabi ng pinuno ng DILG na ang pabuya ay kukunin mula sa intelligence fund ng Kagawaran at ng Philippine National Police (PNP) upang mapabilis ang mga pagsisikap na maaresto si Ang na nananatiling malaya sa kabila ng maraming warrant of arrest na nakapangalan sa kanya.
Nilinaw din ng Pinuno ng DILG na si Ang ay nagtatago pa rin sa loob ng Pilipinas matapos sabihin ng Pamahalaan ng Cambodia na ang puganteng tycoon ay hindi nagtatago sa kanilang bansa, na binanggit na walang rekord ng kanyang pagpasok o paglabas sa Cambodia.
Upang palakasin ang manhunt, gagamit ang gobyerno ng mga drone na may lidar sensor upang magsagawa ng tumpak na operasyon sa paghahanap at pagmamatyag sa paghuli sa mga pinaka-hinahanap na indibidwal sa bansa.
“We’re going to be deploying (the drones) in the next few months para sa mga intensive manhunt operations namin kay Bantag, Atong Ang, at para sa paparating na indictment sa mga floodgate scandal (accused),” sabi ni Remulla. Halaw mula sa Facebook page ng DILG