NANANAWAGAN si Senadora Loren Legarda sa pamahalaan, mga institusyon, at komunidad na harapin ang mga hamon ng bansa sa klima at enerhiya sa pamamagitan ng mas matibay na aksyong pangkapaligiran, kasabay ng pagdiriwang ng Earth Month ngayong Abril at paghahanda sa paggunita ng Earth Day sa Abril 22.
Babala ng senadora, ang patuloy na pandaigdigang krisis sa enerhiya—na dulot ng pabago-bagong presyo ng langis, kakulangan sa suplay, at tensyong geopolitical—ay lalong nagpapabigat sa gastusin ng mga pamilya, nagpapataas ng singil sa kuryente at pamasahe, at nagdudulot ng pagtaas sa presyo ng pagkain at iba pang bilihin.
“Kapag tumataas ang halaga ng enerhiya, sumusunod ang lahat—mula sa ating pagkain hanggang sa paraan ng ating pamumuhay. Kaya naman ang pangangalaga sa kalikasan ay hindi na hiwalay sa pangangalaga sa ating ekonomiya at mamamayan,” ani Legarda.
Ang pandaigdigang tema ng Earth Month na “Our Power, Our Planet” ay nagbibigay-diin sa papel ng bawat sektor sa paghubog ng isang sustainable na kinabukasan. Binigyang-diin ni Legarda na dapat tumugon ang Pilipinas sa tumataas na gastos sa enerhiya at mga sakunang dulot ng klima sa pamamagitan ng mga solusyong nagpoprotekta sa kapaligiran at ekonomiya.
“Ang Earth Month ay hindi lamang tungkol sa malinis na enerhiya. Ito ay mas malawak na pananagutan na pangalagaan ang ating mga ekosistema, protektahan ang mga komunidad, at tiyakin ang katatagan sa harap ng mga hamong pangkapaligiran. Kailangan natin ng isang whole-of-nation na pagtugon,” dagdag niya.
Binanggit ng four-term senator ang mahahalagang batas na matagal na niyang isinusulong, kabilang ang Clean Air Act of 1999, Clean Water Act of 2004, Ecological Solid Waste Management Act of 2000, Climate Change Act of 2009, People’s Survival Fund Act of 2012, National Environmental Awareness and Education Act of 2008, at Philippine Ecosystem and Natural Capital Accounting System (PENCAS) Act. Patuloy na nagsisilbing gabay ang mga batas na ito sa pagtugon ng bansa sa mga panganib at oportunidad na may kinalaman sa kapaligiran.
“Dapat nating pangalagaan ang planetang nagbibigay-buhay sa atin. Ang malinis na hangin, malinis na tubig, at isang malusog na kapaligiran ay mga karapatang maprotektahan para sa lahat ng Pilipino. Kapag nasisira ang ating kalikasan, ang unang naaapektuhan ay ang ating mga pamilya,” ani Legarda.
“Ang bawat hakbang—maging sa polisiya o sa pagkilos ng komunidad—ay dapat maglapit sa atin sa isang Pilipinas na umuunlad nang may balanse sa kalikasan. Ang krisis na kinahaharap natin ngayon ay isa ring pagkakataon upang bumuo ng mas ligtas at mas napapanatiling kinabukasan,” dagdag pa niya.
Binigyang-diin din ni Legarda na ang pakikilahok ng bansa sa mga inisyatiba tulad ng Earth Hour ay nagpapakita ng kapangyarihan ng sama-samang pagkilos.
Ipinunto rin ni Legarda ang kahalagahan ng mga solusyong nakabatay sa kalikasan, tulad ng muling pagtatanim ng mga bakawan upang maprotektahan ang mga baybaying komunidad, rehabilitasyon ng mga watershed upang matiyak ang suplay ng tubig, at pagpapalawak ng luntiang espasyo sa lungsod upang mabawasan ang init at mapabuti ang kalidad ng hangin. Ayon sa kanya, pinatutunayan ng mga inisyatibang ito na ang pakikipagtulungan sa kalikasan ay isa sa mga pinakaepektibong paraan upang harapin ang mga krisis sa klima at enerhiya.
Sa paggunita ng bansa sa Earth Month ngayong Abril, muling pinagtibay ni Legarda ang kanyang pangako na isulong ang mga polisiyang nagpoprotekta sa kalikasan, nagpapalaganap ng renewable energy, at nagpapalakas ng katatagan laban sa climate change, habang tinitiyak na ang mga komunidad ay nananatiling sentro ng napapanatiling kaunlaran.
