AYON kay House prosecutor at Manila Rep. Joel Chua, isa umano si Mary Grace Piattos sa material witness sa isasagawang impeachment trial ni Vice President Sara Duterte.
Kasunod ito sa paglabas ng mga ulat na isa ito sa mga inilistang saksi ng House prosecution panel.
“Material witness po ‘yan lalong-lalo na sa confidential fund. ‘Pag hindi siya lumutang ibig sabihin bogus ‘yan. Kung lumutang naman siya puwede namin siya ma-cross examine,” sabi ni Chua.
Subalit sino nga ba si Mary Grace Piattos?
Ang pangalang Mary Grace Piattos ay lumabas noong 19th Congress nang imbestigahan ng House Committee on Good Government and public accountability inquiry noong 2024 sa paggamit ng budget ng Office of the Vice President at ng Department of Education
Ang Mary Grace Piattos na pangalan ay makikita sa isa sa mga acknowledgment receipt na isinumite ni Duterte sa Commission on Audit (COA) upang patunayan ang kanyang paggastos sa naturang pondo.
Ang acknowledgment receipts ng confidential fund disbursements ay nagpapakita na si Mary Grace Piattos ay isa sa mga tumanggap ng confidential funds mula kay Vice President Sara.
Noon ding 2024, iniulat ng Philippine Statistics Authority (PSA) sa House Committee on Good Government and Public Accountability na walang record ng “Mary Grace Piattos” sa kanilang database.
Samantala, sinabi ni Michael Poa, legal counsel ni VP Sara, na “we are ready to respond to that (Mary Grace Piattos) and explain bakit may mga ganyan.”