KADALASAN masama ang pananaw ng mga tao sa konsepto ng espekyulasyon. Noong 1997 Asian financial crisis tinuligsa ni Dr. Mahathir Mohamad, dating Punong Ministro ng Malaysia ang papel ng mga espekyulator sa pagbagsak ng mga palitan ng salapi sa Asya kasama na ang Malaysian ringgit o MY ringgit sa kasagsagan ng krisis.
Ang espekulasyon ay ang pagbuo ng hinala na walang pinagbabatayang ebidensya. May dalawang pananaw sa espekyulasyonsa ekonomiks. Una, ginagamit ang pwersa ng espekyulator upang magkatotoo ang kanyang hinala. Sa ikalawang pananaw, tinatanggap ng espekyulator ang mga panganib na maaaring hindi magkatotoo ang kanyang hinala.
Ang unang konsepto ang ginagamit na pananaw ni Dr. Mahathir. Naniwala noon si Dr. Mahathir na ang dahilan sa pagtabang ng mga mamumuhunang Amerikano sa demand sa mga salapi sa Asya ay ang paggamit ng pwersa ng ilang makapangyarihang mamumuhunang Amerikano upang maipatupad ang kanilang hinalang babagsak ang presyo ng mga salapi sa Asya. Dahil sa kanilang kapangyarihan sa bilihan ang malaking pondong nakalagak sa iba’t ibang ekonomiya sa Asya ay sabay sabay nilang inilabas at nagbagsakan ang mga salapi sa rehiyon. Dahil dito nagkatotoo ang kanilang hinala.
Ang positibong pananaw ng espekyulasyon ay ang pagtanggap ng mga panganib na maaaring hindi mangyari ang hinala. Makikita ito sa pagbabago ng palitan ng salapi sa hinaharap. Maaaring tumaya ang espekyulator na bumaba ang presyo ng US dolyar ngunit may panganib na tumaas ito at matalo ang espekyulator sa kanyang taya. Kapag naman nagkatotoo ang hinala ng espekyulator kikita ito sa transaksiyon.
Noong Agosto 14, 2025 ang palitan ng salapi ay naitakda sa halagang P57.02 na tinatawag na spot exchange rate (SER) o aktwal na presyo sa araw na iyon. Dahil ang halaga ng palitan ng salapi ay nagbabago araw araw, ang inaasahang palitan ng salapi matapos ang tatlong buwan ay nasa P 56.86 na tinatawag na forward exchange rate (FER). Ang FER ay ang inaasahang palitan ng salapi batay sa agwat ng interest rate sa pagitan ng dalawang bansa at pagtanggal ng arbitrage bunga ng magkaibang interest rate.
Ang FER ay mahalaga sa mga eksporter at importer ng mga bansa upang makaseguro sila sa halaga ng mga bayarin at tatanggaping kita sa kanilang mga transaksiyon sa bilihang internasyonal. Halimbawa, kung ang isang eksporter ay makatatanggap ng kitang $1000 sa kanyang eksport matapos ang tatlong buwan hindi niya alam ngayon ang halaga nito sa PH piso dahil nagbabago ang palitan ng salapi araw araw. Kung ang FER ay naitakda sa P56.86 matapos ang tatlong buwan maaaring gumawa ng isang kontrata ang eksporter na ipagbibili niya ang kanyang kitang $1000 batay sa FER at makaseseguro siyang makatatanggap ng P56,860 matapos ang tatlong buwan.
Ganoon din ang isang importer na kailangang magbayad ng USD 2000 sa loob ng 3 buwan. Dahil hindi niya alam ang SER matapos ang tatlong hindi siya makapaghahanda ng PH piso upang bumili ng USD dolyar. Kaya’t maaari siyang bumili ng $2000 batay sa inaasahang palitan ng salapi o FER na itinakda sa P56.86 matapos ang tatlong buwan.
Ano ang papel ng espekyulator sa pagbabago ng SER araw araw? Dahil naitaktakda ang FER sa hinaharap araw araw, maaaring tumaya ang espekyulator batay sa kanyang hinalang naiiba ito sa FER. Kung ang kanyang hinala na ang SER matapos ang 3 buwan ay mas mataas sa naitakdang FER na P56.86 bibilhin niya ang ipinagbibiling $ 1000 ng eksporter dahil inaasahan niyang siya ay kikita.
Samantala, sa importer na nais bumili ng $ 2000 maghahanap ito ng magbebenta sa kanya ng $2000 batay sa FER na P56.86 matapos ang tatlong buwan. Ang isang espekyulartor na handang magbenta ng $2000 batay sa nasabing FER ay kung ang kanyang hinalang SER matapos ang tatlong buwan ay mas mababa sa naitakdang FER na P56.86 dahil kikita siya kapag ang kanyang hinala ay magkatotoo..
Halimbawang ang SER rate matapos ang tatlong buwan ay naitakda sa halagang P 57.50, nagkatotoo ang hinala ng espekyulator na bumili ng $1000 mula sa kita ng eksporter. Sa ganitong sitwasyon, ang tinanggap niyang $1000 na binayaran lamang niya ng P56,860 ay maipagpapalit niya ng P57,550 at kikita siya ng P640 dahil nagkatotoo ang kanyang hinala.
Samantala, ang espekyulator na nagbenta ng $2000 ay binayaran lamang ng P113,720 na maipagpapalit lamang ito sa halagang $1,977.74 batay sa SER na P57.50 matapos ang tatlong buwan. Nalugi siya ng $22.26 o P1,73.27 dahil hindi nagkatotoo ang kanyang hinala.
Samakatuwid, dahil ang mga espekyulator ay handang tumanggap ng panganib sa kanilang hinala, may bumibili ng ibinebentang ng US dolyar ng mga eksporter at may nagbebenta ng US dolyar sa mga importer. Dahil handang kumita o malugi ang mga espekyulator nagiging episyente ang kalakalang global dahil nakaseseguro ang mga eksporter sa kanilang kikitain at mga importer sa kanilang mga bayarin sa hinaharap.