SA gitna ng patuloy na pag-aalburoto ng Bulkang Mayon sa Albay, nagbigay ng tulong ang Department of Labor and Employment (DOLE) sa mahigit 1,000 indibidwal, kasunod ng panawagan ni Pangulong Ferdinand R. Marcos Jr. na pabilisin ang pagtugon sa sakuna at ang mga pagsisikap para sa pagbangon.
Sa pamamagitan ng Bicol Regional Office, naglaan ang Kagawaran ng mahigit P5.3 milyon para sa emergency employment ng 1,132 apektadong residente sa Albay sa ilalim ng programang Tulong Panghanapbuhay sa Ating Disadvantaged Workers (Tupad).
Ayon kay Regional Director Imelda Gatinao, kasalukuyang minamadali ng DOLE Bicol ang pagpapatupad ng mga programa at tulong, lalo na para sa mga manggagawang nawalan ng hanapbuhay na naninirahan sa loob ng six-kilometer danger zone ng bulkan.
Sa Tabaco City, mahigit 100 benepisyaryo ang nabigyan ng pansamantalang trabaho sa ilalim ng Tupad Kasanayan Program upang tumulong sa paglilinis at pag-aalis ng mga basura o debris, kabilang ang maliliit na pagkukumpuni at paghahanda ng mga silid-aralan sa mga piling pabahay sa Tzu Chi Great Love Village na pansamantalang ginawang learning centers.
Nagpaabot din ng tulong ang Regional Office sa mga benepisyaryo sa Malilipot at Camalig, kasabay ng pagtaas ng bilang ng mga lumilikas. Kasalukuyang sumasailalim sa profiling ang iba pang apektadong barangay at munisipalidad, at inaasahang isusunod na agad ang pamamahagi ng tulong dito.
Mula noong Enero 6, 2026, nasa Alert Level 3 ang Bulkang Mayon dahil sa tumitinding aktibidad nito. Tiniyak ng DOLE na handa itong palawakin pa ang tulong at maghatid ng mas mabilis at mas komprehensibong suporta sa mga apektadong residente kung sakaling mas tumindi pa ang aktibidad ng bulkan.
