BINATI ni Senador Joel Villanueva ang Gilas Pilipinas Women’s Basketball Team kasunod ng kanilang makasaysayang silver medal sa FIBA 3×3 Asia Cup 2026, na aniya’y isang pambihirang tagumpay para sa Philippine sports at pinagmumulan ng national pride.
Sa kanyang Senate Resolution No. 360, ipinagmalaki ni Villanueva ang kauna-unahang medalya sa FIBA 3×3 ng national women’s team na kinabibilangan nina Afril Bernardino, Kacey Dela Rosa, Cheska Apag, at Mikka Cacho.
Nagtapos ang Gilas Women sa ikaapat na puwesto noong 2025 tournament.
Pinuri ni Villanueva ang koponan dahil ipinamalas ng mga miyembro nito ang kanilang pambihirang katatagan at kahusayan sa kabuuan ng torneo, kung saan napasama pa si Bernardino sa Team of the Tournament.
“The Gilas Pilipinas Women’s basketball team’s achievement serves as an inspiration to Filipino athletes, especially women in sports, and highlights the growing strength of Philippine basketball on the global stage,” pahayag ni Villanueva, na naging bahagi rin ng 1994 Philippine Youth Team na lumaban sa SEABA Championship sa Malaysia.
Sinabi ng senador na ang tagumpay ng koponan laban sa mas malalakas na national basketball teams gaya ng Japan at Mongolia ay nagpapakita ng mabilis na pag-unlad at tumataas na competitiveness ng Philippine women’s basketball.
Sa quarterfinals, pinadapa ng Pilipinas ang second seed Mongolia sa score na 15–12, kung saan ipinamalas ng koponan ang kanilang husay sa opensa at depensa.
Nasungkit din ng Gilas Women ang pambihirang panalo laban sa Japan, 21–19, sa semifinals upang umusad sa final match kontra sa malakas na Australian team.
Samantala, binati rin ni Villanueva ang men’s 3×3 basketball team matapos makatungtong sa quarterfinals, na siyang pinakamataas na resultang natapos ng koponan sa tournament mula noong 2022.
Ayon pa kay Villanueva, isa sa mga tagasulong ng sports development sa bansa, ang dedikasyon ng mga manlalaro, coach, at support staff ng Gilas Pilipinas ay sumasalamin sa disiplina, sigasig, teamwork, at pagiging makabayan na nagdadala ng karangalan sa sambayanang Pilipino.
“Kulang man po tayo minsan sa tangkad, higante naman ang puso ng ating mga atletang Pinoy para mabigyang karangalan ang ating mga kababayan,” ani Villanueva.
