Sunud-sunod na pag-ratsada ng merchandise trade mula Enero 2025, tuluy-tuloy na ba?

IKATLONG buwan nang sunud-sunod na pag-ratsada ng merchandise trade mula noong Enero 2025. Tuloy-tuloy na ba ito? Hindi ba ito biglang  titigil dahil sa magulong world economy?

Umakyat ng 7.4% ang naitalang total merchandise trade na umabot sa 51.2 bilyon noong unang tatlong buwan ng 2025. (Table 1). Umakyat ang exports ng 5.7% year-on-year (YOY) samantalang ang imports ay lumago ng 8.4%.

Sa ganang exports, halos lahat ng major exports ay lumago. Ang pinakamalaking paglago ay naitala ng fruits and vegetables (7.2%), machinery and transport equipment (5.8%), garments and apparel (2.6%), electronics (0.4%), at chemicals (0.2%). Ngunit patuloy ang paglugmok ng copper metal na bumulusok pababa ng    -94.5% noong unang tatlong buwan kumpara sa -83.5% noong 2024. Ang madilim na outlook sa karamihan ng consumer goods, kung saan malaking bahgdan sa ating export products ay intermediate product, ay dahil sa dampening impact sa buong mundo ng mataas na inflation sa consumer demand. Ganoon din ang pagtaas ng interest rates na siyang dahilan ng pag-iwas sa pagpapalawak ng manufacturing capacity ng mga negosyo.

Sa ating export markets, sa 20 na pinakamalaking bansa, anim lang ang nagpakita ng pagbagsak. Kasama sa mga bumagsak na markets ang China,  Korea, Taiwan, Vietnam, Thailand, at Indonesia. Ito ay mas mababa kaysa sa pito na naitala noong nakaraang taon.

Sa mga major imports, halos lahat ay lumago nang double-digit kasama ang electronics components, telecom equipment and electrical machinery,  at transport equipment na lumago sa antas na 27.1%, 14.7%, at 11.1%, respectively.  Umangat naman ang imports ng power generating and information technology  machinery ng 7.7% kumpara sa -4.9% noong nakaraang taon. Bumaba ang imports ng  minerals fuels and lubricants (-12.2%) dahil sa pagbagsak ng presyo ng langis mula sa US$81.6/bariles noong nakaraang taon sa $76.3/bariles noong unang tatlong buwan ng 2025.

Dahil mas mataas ang paglago ng imports kaysa sa exports, tumaas ang balance of trade deficit sa  merchandise goods.  Mula sa 9.8% ng GDP noong 2024, umakyat ito sa 10.1% noong unang tatlong buwan ng 2025.

Sa kabuuan, patuloy ang magulong direksiyon ng export at import demand habang patuloy na nilalabanan ang pandaigdigang suliranin sa inflation at interest rates. Lalo pa itong pinagulo ng trade war ng USA at ng major trade blocs na maaaring lalala sa mga susunod na buwan. Kaya sa kabuuan, hindi malinaw kung magiging normal na ang daloy ng pangangalakal sa taong ito.