Umakyat ang year-on-year inflation sa 1.7% noong Agosto. Anu-ano ang mga dahilan sa pag-akyat na ito?   

UMAKYAT ang year-on-year (YOY) inflation sa 1.7% pagkatapos nitong maabot ang 1.5% noong Hulyo at ang pinakamababang antas ng inflation na 0.9% noong Hunyo sa loob ng halos anim na taon. Ngunit nanatili ang year-to-date (YTD) na average inflation sa 1.7%, mas mababa pa rin sa 2-4% na projection para sa buong taon.  (Table 1).

Limang sunud-sunod na bagyo noong Hulyo at apat noong Agosto ang nanalasa sa mga pananim, mga livestock farms, at palaisdaan at nagpatigil sa pangingisda ang naging mitsa sa muling pag-akyat ng presyo ng  maraming produkto at serbisyo noong Agosto.

Pinakamalaking pag-akyat ang naitala ng pagkain na lumipad sa 0.8% mula sa negatibong antas na -0.5% noong Hulyo.

Umakyat ang presyo ng gulay ng 19.4%, cooking oil ng 9.3%, isda ng 7.9%, karne ng 6.0%, at gatas at itlog ng 2.5%.  Mabuti na lang at bumaba ang presyo ng bigas ng -16.9%, mais ng -4.5%,  at  asukal   ng -0.1% at matatag at mababa ang inflation ng ready-made food (2.3%), at tinapay, (1.5%), at nabawasan ang pataas na trend.

Lumobo ang YOY inflation ng non-food items ng 2.0% mula sa 1.8% dahil umakyat ang YOY inflation ng  financial services sa 2.4%; housing, water, electricity, gas at fuels sa 2.2%; at information at communication sa 1.0%. Samantala, bumaba ng YOY inflation ng alcoholic beverages at tobacco sa 4.1%; health sa 2.8%; at transport sa 2.8%. Nanatili namang matatag ang restaurants at accommodation services sa 3.0%; furnishings, household equipment, at routine maintenance services sa 2.4%; education services sa 2.0%; clothing at footwear sa 1.7%; recreation, sports, at culture sa 0.6%; at personal care at miscellaneous goods at services sa 0.0%.

Hindi gumalaw  ang  month-on-month  (MOM)  inflation  sa  0.0% mula sa 0.6% noong Agosto.  Bumaba ang pagkain ng -0.4% mula sa 0.6%; at nanatili ang non-food sa 0.2%.

Base sa MOM inflation, nanatili sa 0.0% ang bigas at ready-made food at other food products. Umangat ang MOM inflation ng mais sa 0.9%; at bumaba ang antas ng vegetables ng -2.0% mula sa 15.8% ;    karne   ng -1.8% mula sa 0.7%; asukal ng -0.2% mula sa 0.0%; fish sa 0.6% mula sa 2.8%; oils at fats sa 0.6% mula sa 0.9%; gatas at itlog sa -0.1% mula sa 0.5%; at non-alcoholic beverages sa 0.3% mula 0.4%.     Hindi gumalaw ang arina, tinapay, at pasta sa 0.2%.

Sa non-food category naman, bumaba ang MOM Inflation ang pitong produkto at serbisyo, umakyat ang apat, at di gumalaw ang isa.  Kasama sa mga bumaba ang alcoholic beverages at tobacco (0.2%); housing, water, electricity, gas at fuels (0.2%);  furnishings, household equipment at maintenance (0.2%); health (0.2%); restaurants at accommodation services (0.2%).  transport (0.2%;  at education (0.0%). Kasama sa umakyat ang recreation, culture at sports (0.3%); clothing at footwear (0.3%) ; recreation, sports at culture (0.3%); at information at communication (0.2%); at personal care at miscellaneous goods (0.3%). Di gumalaw ang financial services (0.0%).

Bumaba ang core inflation sa YOY inflation na 2.6% at ang MOM inflation na 0.0%.  Dahil ang naitalang 1.7% na YOY inflation ay mas mababa pa rin kaysa sa  lower end ng target inflation range na 2-4%, niluwagan ng Bangko Sentral ng Pilipinas (BSP) ang  antas ng liquidity noong Oktubre at binabaan ang policy rate sa 4.75% mula sa 5%. Kailangan ito para lumapit ang ekonomiya sa GDP growth target na 5.5% hanggang 6.0% sa 2025.