Patuloy ang paglago ng merchandise trade ng Pilipinas, tuloy-tuloy na kaya ito?

SIMULA noong Enero hanggang Oktubre 2025, patuloy ang pagratsada ng merchandise trade ng Pilipinas. Lumago ang year-on-year (YoY) growth ng 8.5%, mas mataas kaysa sa 0.5% noong nakaraang taon. Mas mabilis ang paglago ng exports  na umakyat ng 13.8% kaysa sa imports na lumago rin pero sa mas mababang 4.3%. Mas mataas din ang  mga  antas  na  ito   kumpara sa pagbaba na  -0.5% export growth at ang  matumal na pag-akyat 1.1% ng imports noong kaparehong period noong nakaraang taon.  (Table 1)

Sunud-sunod na double-digit ang pag-akyat ng exports—15.5% noong Mayo,  26.9% noong Hunyo, at 17.6% noong Hulyo, 16.2% noong Setyembre at 19.3% noong Oktubre. Tanging sa Agosto medyo bumababa ang paglago sa 5.5%. (Table

Dahil mas mabilis ang paglago ng exports kaysa sa imports, nahulog nang bahagya  ang trade deficit sa US$44.321 bilyon, 14.5% ng GDP kumpara sa 16.3% noong nakaraang taon.

Sa ganang exports, halos lahat ng major exports ay lumago. Ang pinakamalaking paglago ay naitala ng gold (84.5%), machinery at transport equipment (44.6%), fruits and vegetables (20.0%), electronics (12.6%), at garments at apparel (6.3%).  Tanging bumaba ang chemicals na umurong ng -4.3%.

Sa mga major imports, halos lahat ay lumago nang double-digit kasama ang electronics components (17.8%), telecom equipment at electrical machinery (17.4%), at transport equipment (9.5%). Matumal nang bahagya ang power-generating at electronic data processing machinery (6.1%). Tanging bumaba ang imports ng  minerals fuels and lubricants (-14.7%) dahil sa pagbagsak ng presyo ng langis mula sa US$83.14/bariles noong unang sampung buwan ng nakaraang taon sa US$70.36/bariles ngayong sampung  buwan ng 2025.

Sa mga major export markets ng Pilipinas, pinakamalaki ang paglago ay naipakita ng Australia, Canada, at India na lumago ng 251.9%, 161.1%, at 43.2%, respectively. Ito ang mga bansang labis naapektuhan ng pagtaas ng taripa ng US. Kasunod dito ang Germany (30.6%), Switzerland (29.4%), Mexico (27.0%), Singapore (22.5%), Hongkong (20.4%),  Netherlands (18.9%), United Arab Emirates (16.9%), at Malaysia (15.0%). Samantala, umurong ang exports sa mga bansa sa Asya na dating namamayagpag sa paglago ng trade gaya ng South Korea (-12.0%), Vietnam (-5.5%), China (-4.5%), Vietnam (-3.9%), Indonesia (-3.6%), at Thailand (-3.3%).

Sa kabuuan, kahit na magulo ang sitwasyon ng world trade, malakas ang export at import sektor ng Pilipinas. Ang sektor na ito ay nahasa sa mga pag-akyat at pagbaba ng demand at supply, ang papalit-palit na galaw ng mga presyo, at ang biglang nawawalang market dahil sa giyera at mga kaguluhan. Dahil nasanay na sila sa magulong mundo, mabilis silang tumiwalag sa isang merkado na nagsara at lilipat sa kung saan may pagkakataon. Maliksi silang lilihis at iiwas kapag nawala ang kanilang dating binebentahan. Kasama ang mga Filipino overseas workers, sila ang patuloy na maliksing growth drivers ng ekonomiya.