OPISYAL nang inanunsyo ni Senador Risa Hontiveros na magbubukas ng imbestigasyon ang Senate Committee on Women, Children, Family Relations, and Gender Equality sa Hulyo 1, 2026 hinggil sa pamamaril sa paaralan sa Tacloban at sa lumalaking banta ng online radicalization sa mga bata.
“Sa July 1, muli nating bubuksan ang pagdinig para alamin kung may papel ang mga online platforms sa pagkalat ng mararahas na ideya. Nagiging pugad ng mga grupong nambe-brainwash at nagra-radicalize sa mga bata,” sabi ni Hontiveros.
“Nakakadurog ng puso ang naganap na pamamaril sa San Jose National High School sa Tacloban City.
“Nakikiramay ako sa mga pamilya ng mga nasawi, sa mga nasugatan, at sa buong komunidad ng paaralan na nagdadalamhati rin dahil sa karumal-dumal na insidente.
“Ang paaralan ay hindi dapat lugar ng takot at karahasan. Schools are safe spaces at dapat manatili silang ligtas na lugar upang makapag-aral ang ating mga estudyante nang malaya at walang pangamba.
“Habang hinihintay natin ang buong katotohanan, nananawagan ako ng isang masusing imbestigasyon kung paano ito nangyari.”
Sabi pa ni Hontiveros, “Bilang chairperson ng Senate Committee on Women, Children, Family Relations, and Gender Equality, gagawin natin ang lahat para hindi na maulit kailanman ang school shooting sa ating bansa. Hindi tayo dapat masanay sa ganitong karahasan.”
Ang pagdinig ay kasunod ng imbestigasyon ng komite noong Abril 14, 2026, kung saan nabunyag na ang mga online platform at gaming space ay umano’y ginagamit upang alagaan, manipulahin, at gawing radikal ang mga bata tungo sa karahasan.
“Titingnan natin ulit kung may sapat bang ginagawa ang lahat ng online platforms para hindi mapagsamantalahan ang mga kabataan,” sabi ni Hontiveros.
Sa pagdinig noong Abril 14, tinalakay din ng komite kung paano ginamit ang mga online platform hindi lamang para sa marahas na radikalisasyon, kundi pati na rin para sa online na sekswal na pang-aabuso, pagsasamantala, pag-aayos, at pangingikil sa mga bata.
“Kung ginagamit ang internet para biktimahin ang mga bata, dapat may managot. Hindi pwedeng kita lang lagi ang iniisip ng Big Tech habang ang ating mga pamilya at paaralan ay nababalot ng trahedya.”
“Hindi natin hihintayin na magkaroon ng sunod pang biktima bago kumilos. Dapat makapasok ang bawat bata sa paaralan nang ligtas at makauwi rin nang ligtas sa kanilang pamilya,” pagtatapos niya.
